എറണാകുളം ജില്ലയിൽ അദ്വൈത ആചാര്യൻ ജഗദ്ഗുരു ആദി ശങ്കരാചാര്യരുടെ ജന്മം കൊണ്ട് പവിത്രമായ കാലടിയ്ക്കും പെരുമ്പാവൂരിനും മദ്ധ്യേ കാശിയിലെ ഗംഗയ്ക്ക് സമാനമായി പടിഞ്ഞാറു നിന്നും കിഴക്കോട്ടോഴുകുന്ന പൂർണ്ണാ നദിക്കരയിൽ കിഴക്കോട്ടു ദർശനമായി ദാരിക വധത്തിന് ശേഷം രൗദ്ര ഭദ്രകാളീ ഭാവത്തിൽ വടക്കൻചൊവ്വ ഭഗവതിയും വാണരുളുന്നു.

പടിഞ്ഞാറോട്ട് ദർശനമായി സംഹാരമൂർത്തിയും സകല ചരാചരങ്ങളുടെയും മോക്ഷപ്രാപ്തിക്കു കാരണഭൂതനുമായ കാശിനാഥൻ ശ്രീ മഹാദേവനും, വടക്കോട്ട് ദർശനമായി ശത്രുസംഹാരിണിയും അത്യുഗ്രസ്വരൂപീണിയുമായ ശ്രീ ചാമുണ്ഡേശ്വരിദേവിയും വാണരുളുന്ന ഈ സന്നിധി ഭക്തജനങ്ങൾക്ക് അപൂർവ്വമായ ആത്മീയ അനുഭവമാണ് നൽകുന്നത്.

ഇഷ്ട്ടകാര്യസിദ്ധിയ്ക്കും ശത്രുദോഷനിവാരണത്തിനുമായി ശാക്തേയ വിധി പ്രകാരം കൗള മാർഗ സമ്പ്രദായത്തിൽ കൊല്ലൂർ മൂകാംബികയുടെ മൂലസ്ഥാനമായ കുടജാദ്രിയിൽ നടക്കുന്ന ശക്തിപൂജയുടെ അതേ ചിട്ടവട്ടങ്ങളോടെ എല്ലാ ദിവസവും ഉച്ചയ്ക്ക് 11.30 ന് "വലിയ ഗുരുതി" (കലശം) നടത്തുന്ന കേരളത്തിലെ അപൂർവ്വം കാവുകളിലൊന്നാണ് ഈ ക്ഷേത്രം.

ചേലാമറ്റം ശ്രീ പുഴക്കരക്കാവ് വടക്കൻചൊവ്വ ഭഗവതി ക്ഷേത്രം മഹത്തായ ആർഷ ഭാരത സംസ്കാരത്തിന്റെ പ്രതീകങ്ങളായ വേദോപനിഷത്തുക്കൾ പ്രകാരം ഭൂമിയിൽ സൃഷ്ടി ബ്രഹ്മ ദേവനും സ്ഥിതി വിഷ്ണു ഭഗവാനും സംഹാരം അഥവാ മോക്ഷം ശ്രീ മഹാദേവനുമാണ് നിർവ്വഹിക്കുന്നത് എന്ന ദൈവിക സങ്കൽപ്പത്തെ അനുസ്മരിപ്പിക്കുന്നു.

പുണ്യ തീർത്ഥങ്ങളിൽ പിതൃക്കളുടെ മോക്ഷത്തിനായി കർമ്മങ്ങൾ ചെയ്യുന്നവർ അതിനു മുൻപോ ശേഷമോ കാശിനാഥനായ ശ്രീ മഹാദേവനെ കൂടി ദർശിച്ച് യഥാശക്തി വഴിപാടുകൾ ചെയ്ത് തങ്ങളുടെ ആയുരാരോഗ്യ സമ്പദ് സമൃദ്ധിക്കു വേണ്ടി പ്രാർത്ഥിക്കുന്നത് ശ്രേഷ്ഠമാണ്. ജാതകവശാലുള്ള കാളസർപ്പദോഷ പരിഹാരത്തിന് എല്ലാ വെള്ളിയാഴ്ചയും രാഹുകാല സമയത്ത് രാവിലെ 10.30 മുതൽ 12.00 വരെ വിശേഷാൽ പൂജകൾ നടത്തുന്നു.

ആയില്യം നാളിൽ നാഗരാജാവിനും നാഗയക്ഷിക്കും നൂറും പാലും കൊടുക്കൽ, ആയില്യം പൂജ എന്നീ വിശേഷാൽ വഴിപാടുകളും നടത്തുന്നു. ഭക്തരുടെ ആവശ്യമനുസരിച്ച് വിവിധ ദോഷനിവാരണ, ഐശ്വര്യ, ആരോഗ്യ പ്രാർത്ഥനകൾക്കായി വിശേഷാൽ വഴിപാടുകൾ ക്ഷേത്രത്തിൽ സൗകര്യത്തോടെ നടത്തപ്പെടുന്നു.